CAMACURI (26 di juli 2012) - E calidad, durabilidad y eficiencia di autonan Toyota a keda confirma cu e confianza cu Cuerpo Policial Aruba a deposita den e marca ora cu a scoge nan como nan autonan nobo di patruyahe. E flota di 26 automobil cu a keda entrega e siman aki ta consisti di modelonan Prado y Landcruiser y ya caba a cuminsa subi caminda pa proteccion di e ciudadanonan di Aruba.
E acto y firma di entrega oficial a tuma luga diamars ultimo na sede di Garage Cordia Aruba su showroom na Camacuri. E ceremonia a conta cu presencia di Minister di Justicia y Enseñanza, Sr. Arthur Dowers, Alto Comisario di Cuerpo Policial Aruba, Sr. Adolfo E. 'Dolfi' Richardson hunto cu Sr. Hans Schnog, Director Geneal y Howman Chow, Director Comercial di Garage Cordia Aruba. Tambe tabatey varios agente policial, ehecutivonan y personal di Garage Cordia Aruba, companianan asocia y prensa.
Garage Cordia, mescos cu varios otro agencia di auto, a participa den e destaho publico habri dor di Land Aruba pa medio di Ministerio di Husticia. E oferta di e distribuidor nacional di Toyota a resulta esun mas califica y competente despues di e revision cu varios oficial a haci pa percura cu e autonan ta cumpli cu tur e criteria y rekisitonan necesario e trabou na nos isla.
Un bes cu Garage Cordia Aruba a haya e aprobacion, a proceso di e order a tuma aproximadamente ocho siman pa keda cla. Un bes cu tur e Pradonan a yega, a inicia un trabou den conhunto cu otro companianan local cu a percura pa e autonan ta ekipa cu e acesorionan necesario manera zwaailicht, sirena, radio, etc. y naturalmente e stickernan tur rond cu ta identifica nan como patruya di Polis di Aruba.
E modelo Landcruiser destina pa fungi como loke antes den pueblo tabata yama 'Dogcatcher', a yega poco despues di e Prado y esakinan tambe mester a pasa den un fase di adaptacion pa cumpli cu criteria di Cuerpo Policial Aruba. Entre otro, a cambia e posicion di e stoelnan patras y añadi elementonan di siguridad. Otro detaye cu mester a cambia ta e porta patras cu mester ta dos, na luga di un so y esaki tambe mester ta separa cu heki mescos cu entre e chofer y e pasaheronan patras, caminda ta transporta detenido.
Garage Cordia Aruba ta orguyoso di tur esfuerzo y dedicacion cu nan personal a duna pa cumpli cu e ordo aki pa Cuerpo Policial Aruba. Awe e agencia ta satisfecho di entrega un producto final di nivel halto. Den esaki Garage Cordia Aruba a conta cu e sosten completo di e corporacion internacional Toyota loke a agiliza e entrega di e pedido te na nos isla y segun e specificacionnan haci.
Pero e trabou no ta caba aki, ya cu Garage Cordia Aruba lo percura tambe pa e mantencion di e flota. Di e manera aki ta garantiza cu e autonan ta keda den un condicion optimal loke na su luga lo alarga ainda mas nan tempo di funcion. Pa esaki Garage Cordia Aruba ta para duro ya cu tin como base un departamento di servicio excelente y un departamento di pieza completo.
Ta tuma e oportunidad aki pa un bes mas gradici Gobierno di Aruba, Ministerio di Husticia y Cuerpo Policial Aruba pa e confiansa duna na Garage Cordia Aruba y ta felicita pueblo cu e adkisicion di e flota nobo aki cu ta cla y capaz pa brinda seguridad den tur skina.
