Den cuadro di celebracion di nan 50 aña di existencia
ORANJESTAD, Aruba - 12 di maart 2015: E expectativa ta hopi halto pa celebra hunto cu pueblo e di 50 aniversario di Garage Cordia Aruba. Manera a priminti cada luna Garage Cordia lo organisa un evento pa celebra cu e compania ta sigui innova y percura pa productonan nobo, tecnologia moderno y brinda clientenan un variacion di autonan.
Luna di Maart ta den cuadro di celebracion di e 50 añanan di e modelo di auto, Toyota Corolla na Aruba. Tabata 10 aña pasa, na aña 2005, cu Garage Cordia Aruba a habri su portanan den e edificio na Camacuri, dunando mucho mas espacio pa por sirbi e clientenan miho, cu mas facilidad y den un forma mucho mas eficiente.
E agencia di auto awor ta cla pa celebra esaki hunto cu Camacuri Harley Davidson Club. Hunto nan ta organisa un tremendo Car & Bike Show dialuna 16 di Maart. Tur esunnan cu kier show nan auto of brommer ta invita pa inscribi desde diabierna na Garage Cordia pa esaki.
Leo Laurens di Iron Rockets Club di Bonaire ta gradici Aruba pa invitacion pa participa un biaha mas na e "18th Ride @ Camacuri" y ta afirma participacion di 23 bikers na e evento aki. Mientras cu for di Corsou ta spera 101 participante y for di Surinam lo yega 8 participante. Esey sin conta e personanan cu ta yega hunto cu nan pa pasa un bunita vakantie di un siman.
Un total di 7 container lo yega Diabierna 13 di Maart p'asina inicia e siman di fiesta. Durante e anochi aki tambe por inscribi pa e ride di dia 18 di Maart. For di 9:00pm te cu 1:00am lo tin musica di Perfect Sound pa anima tur presente. Lo tin tentnan di cuminda.
Diasabra 14 di Maart lo tin e prome "Night ride" di e bikersnan cu lo inicia na Manuelito's Bar y lo termina na Rock's Cafe cu wega y musica. Diadomingo 15 di Maart lo tene e Scavengers Hunt na Trappers Club cu diferente wega full rond y na final ora tur persona a completa e hunt aki den oranan di anochi lo tin masha hopi premio. Riba dia 16 di Maart tambe Camacuri Harley Bikers ta tene loke ta wordo yama e "preliminar mini tour" cu lo sali for di Camacuri Center y despues termina na Garage Cordia. Lo ta un tremendo evento hunto cu Cool FM y Doit Center.
Dia 17 di Maart, Cascabel Bikers ta organisa nan evento di recorido cu ta inicia pa 7.30pm na The Ranch Salloon na Olde Molen rumbo San Nicolas y lo termina despues un biaha mas na The Ranch Salloon na unda tin un anochi di wega y hopi musica.
Dia 18 di Maart ta e culminacion, cu cada aña ta bira mas y mas grandi. Ta inicia na Trappers Club cu un desayuno y lo tin recorido rond di Aruba y ta termina despues na Trappers un biaha mas cu un anochi di entregamento di premio.
Garage Cordia Aruba a habri su portanan na juli 1965 y tin como meta pa sostene eventonan local cu ta bunita pa comunidad. Gran parti di e entradanan di e eventonan aki ta destina pa e muchanan special y di Casa Cuna.
