ORANJESTAD, Aruba - 15 di Juni 2019: Ayera mainta Director di DIMAS, mr. Kathy Paskel a tuma e yabinan over di tres auto nobo for di Garage Cordia Aruba. Ta trata aki di tres auto marca Toyota modelo Rush di aña 2019. E autonan aki ta pa yuda e departamento mobilisa miho pa e trabounan cu nan tin, relaciona cu admision di stranheronan riba nos isla.
E modelo Toyota Rush ta e unico modelo SUV cu ta costa menos di 50 mil florin na Aruba. Ta un modelo nobo cu Garage Cordia a introduci aña pasa y cu ta masha exitoso mes, tanto den uzo eficiente di gasolin, como tambe den e forsa cu e auto aki tin. Banda di esey, e tin tres fila di stoel, riba cual por sinta 7 pasahero.
Kimberly van der Linde, Sales Associate na Garage Cordia a entrega yabinan di e tres autonan na DIMAS, representa pa nan Director y algun empleado. Nan tabata masha contento cu DIMAS a cambia pa Toyota, e auto miho bendi na mundo y esun mas bendi na Aruba.
Tocante DIMAS
DIMAS, Departamento di Integracion, Maneho y Admision di Stranhero ta operacional desde 1 di Juli 2006 y ta situa na Paardenbaaistraat 11 (ex edificio di Ontvanger), na Oranjestad. DIMAS ta encarga primordialmente pa procesa peticionnan pa un permiso di estadia y residencia temporario of definitivo na Aruba (sea cu ta pa traha of no). Anualmente DIMAS ta atende mas o menos 15 mil peticion, entre 125 pa 180 cita pa dia. Pa keda na altura di (cambionan den) procedura, proceso, maneho, download formulario y lista di rekisitonan y tambe pa traha bo cita online pa e diferente servicio y producto, bishita nan website www.dimasaruba.com.
Garage Cordia Aruba
A funda Garage Cordia Aruba na Juli 1965 ora cu a bestel e prome 12 autonan di marca Toyota pa nos isla. Awendia, despues di mas cu 53 aña, keto bay e compania tin e record di a bende mas auto den historia di nos pais, tanto como agencia como tambe e marca Toyota. Nan ta conoci specialmente pa e bon calidad di e autonan, pero sin lubida cu nan ta e unico cu tin un surtido grandi di piesa pa drecha of ora di “service” e vehiculonan.
